Henrik Olsen 1 (Foto: Kenneth Hætta)

Bidjat fokusa dáruiduhttinpolitihkkii

16. Skábmamánnu 2016

Sámediggeráđđi háliida bidjat johtui duohtavuođa- ja soabadanproseassaid dáruiduhttinpolitihkas. Bargu ferte čađahuvvot oktasaš ovttasbargun gaskal sámi ja dáža servodaga.

Sámediggi lea bidjan johtui politihkalaš barggu man ulbmil lea heaittihit ja loahpalaččat njulget stáhtalaš ja eiseválddiid dáruiduhttinpolitihka min álbmoga vuostá, min giela, kultuvrra ja servodateallima vuostá áigodagas 1800-logus ja gitta otnážii.

-Jus mii galgat sáhttit dan dahkat, de fertet mii sápmelaččat – ja majoritehtaservodat – ipmirdit ja dohkkehit maid dáruiduhttipolitihkka sisttisdoallá ja makkár váikkuhusaid dat mielddisbuvttii ja ain mielddisbuktá midjiide – sihke álbmogin ja ovttaskas olmmožin, maiddái odne, lohká sámediggeráđđi Henrik Olsen.

-Oallugat vásihit ahte dáruiduhttinpolitihka eallá ain viidáseappot ođđaáigásaš hámis ja ođđa giellahámis. Mii oaidnit dan mediaid debáhtta- ja kommentárafealttain go min kultuvra ja min ealáhusat namuhuvvojit. Mii gullat dan go gullat ciellamiid spábbačiekčanšiljuin gosa sápmelaččat servet. Mii dovdat dan go deaivvadit almmolaš eiseválddiid vuosteháguin sihkkarastit ja vuhtiiváldit min vuoigatvuođaid ja beroštumiid mánáidgárdefálaldatgažaldagain, skuvla- ja oahpponeavvofálaldagain, kulturásahusain, sámi ealáhusain, giela- ja luonddu- ja resurssahálddašeamis, lohká Olsen.

Sámediggeráđđi Henrik Olsen lohká ahte dáruiduhttinpolitihkka lea billistan oktavuođaid gaskal sápmelaččaid ja dážaid. Dát lea mielddisbuktán váilevaš luohttámuša ja ipmárdusa, ja lea maid mielddisbuktán soabatmeahttunvuođaid. Eahpeluohttámuš dovdo maid diliin  sápmelaččaid gaskkas; bearrašiin; giliin ja báikegottiin ja gaskal iešguđet joavkkuid sámi servodagas, lohká Olsen.

-Juolludeamit sámi mánáidgárddiide, oahpponeavvuide, gillii ja kulturdoaimmaide leat unniduvvon maŋimus jagiid, vaikke stáhtabušeahtta lea sturron juohke jagi. Boađus lea systemáhtalaš vealaheapmi gaskal dáža ja sámi servodaga, lohká Olsen.

-Soabadeapmi, buoret luohttevašvuohta ja ođasteapmi sámi servodaga ja dáža stuoraservodaga gaskavuođain – gaskal sámi ja dáža eiseválddiid – ferte čađahuvvot proseassaid bokte mat leat huksejuvvon árvvusatnima, dohkkeheami, mieđiheami ja álbmotrievttalaš standáriiid nala, lohká sámediggeráđđi Henrik Olsen.

Sámediggeráđđi evttoha earret eará ásahit duohtavuođa- ja soabadankommišuvnna, eanet dutkama ja gaskkusteami sámi historjjás. Ferte maid árvvoštallat buhtadanortnegiid veahkaváldima, massima ja traumaid ovddas dáruiduhttinpolitihka geažil.

Eanet dieđuid oaččut:

Sámediggeráđis Henrik Olsen, 907 75 219