Duodji jođihanfápmun
Ealáhusat
Mearraealáhusat
Hilgu luossašiehtadusa Norgga ja Suoma gaskka
Silje Karine Muotka 2 (Foto: Kenneth Hætta)

Hilgu luossašiehtadusa Norgga ja Suoma gaskka

07. Golggotmánnu 2016

Sámedikki dievasčoahkkin hilgu šiehtadusevttohusa Norgga ja Suoma gaskka guolásteami birra Deanučázádagas ja guoskevaš reguleremiin. Šiehtadus rihkku báikki olbmuid guhkesáiggi ja árbevirolaš guolástanvuoigatvuođaid.

Šiehtadusbeliin Norggas ja Suomas eai leat leamaš buori proseassat singuin geain leat vuoigatvuođat, eaige leat váldán vuhtii báikegottiid olbmuid árbedieđu.

Sámediggeráđi Silje Karine Muotka lohká ahte šiehtadusas váilu báikkálaš doarjja ja legitimitehta dan sivas go juogo Norgga dahje Suoma beali sámedikkit, gielddat mat gusket čázádahkii, Finnmárkku fylkkadiggi ja Finnmárkku stuorradiggeáirasat dahje báikegottiid olbmot geain leat vuoigatvuođat, dorjot dán šiehtadusa.

-Luossa lea deaŧalaš buohkaide geat ásset Deanučázádaga bálddas, ja danne leat buohkat ovttamielalaččat dasa ahte geahpedit bivddu, muhto mii fertet vuoruhit báikegottiid olbmuid bivddu turisttabivddu ovddabeallái, lohká Sámediggeráđi Silje Karine Muotka.

-Fierbmebivdit Deanučázádagas leat sakka geahpedan iežaset bivddu maŋimuš jagiid, ja dasa lassin lea fierbmebivdiid lohku maid sakka unnon, seammás go turistabivdu Suoma bealde lea lassánan nu ahte eai nagot bearráigeahččat, lohká Muotka. 

Sámediggi čujuha ahte lea juo oktavuohta organisašuvnnaid ja vuoigatvuođalaččaid gaskka ja sis lea duohta dáhttu šiehtadallat nu guhká go dat dáhpáhuvvá iežaset ja báikkálaš eavttuid mielde. Sámediggi áigu maid lasihit ahte Norgga beali mearraluossabivdiide čuohcá dát regulerenevttohus sihke njuolgga ja eahpenjuolgga.

-Mearraluossabivdu Norgga bealde lea reguleremiiguin garrasit geahpeduvvon maŋimuš jagiid, ja šiehtadus lea lassi áittan dán árbevirolaš bivdui, lohká Muotka.

-Norgga beali Sámediggi lea ovttajienalaš mearrádusas dadjan ahte dán šiehtadusa ii galggašii Stuorradiggi dohkkehit. Justa seamma lágán čielga vuordámuša lea Sámediggi ovddidan ráđđehussii do lea leamaš oktavuohta dán áššis. Danne leat sakka suorganan ja hirpmástuvvan go ráđđehus lea válljen badjelgeahččat sin čielga jiena geaidda ášši báikkálaččat guoská, lohká Muotka.

-Mii doaivut ahte šaddet konstruktiivvalaš gulahallamat Stuorradikki bellodagaiguin vai eastadivččiimet ahte min guolleresurssat juogaduvvojit vel eanet boastut.  

Dás sáhtát lohkat dievasčoahkkima mearrádusa:

Eanet dieđuid addá: Sámediggeráđi Silje Karine Muotka, 984 87 576