Duodji jođihanfápmun
Giella
Faktadieđut sámi gielaid birra
Gollegiellabálkkašupmi ođđajurddašeddjiide
Jan Skoglund Paltto Kisti Paltto Máret Steinfjell och Ingá-Márjá Steinfjell (Foto Marianne Andersson)

Gollegiellabálkkašupmi ođđajurddašeddjiide

08. Skábmamánnu 2016

Dán jagáš Gollegiellabálkkašumi ožžot Máret ja Inga Márjá Steinfjell ja Kirsi ja Jan Skoglund Paltto. Sámediggepresideanta Aili Keskitalo ja gieldda- ja ođasmahttinministtar Jan Tore Sanner sávvaba lihku bálkkašumi vuitiide.

Dán jagi Gollegiela vuoitit ovddastit ođđajurddašeami sámegielaid gaskkusteamis. Buollisearat leat leamašan ja leat dehálaččat sámi giellabarggu doaimmaheapmái. Lea positiivvalaš ahte nuorra sámit čájehit beroštumi bargat sámegielaiguin.

–Lea illudahtti ahte teknologiija geavaheapmi addá ođđa vejolašvuođaid sámi gielaid oahpaheapmái ja geavaheapmái, dadjá gieldda- ja ođasmahttinministtar Jan Tore Sanner.

Giellabálkkašumi leat ásahan Norgga, Ruoŧa ja Suoma ministarat geain lea ovddasvástádus sámi gažaldagaide ja daid riikkaid sámediggepresideanttat. Davviriikkalaš Gollegiella-bálkkašumi ulbmil lea ovddidit, ovdánahttit ja seailluhit sámegielaid Norggas, Ruoŧas, Suomas ja Ruoššas.

Bálkkašupmi lea 15 000 euro ja dat juhkkojuvvo ovttaskasolbmuide, joavkkuide, organisašuvnnaide dahje ásahusaide geat leat dahkan mávssolaš áŋgiruššama sámegielaid ovddideami várás. Bálkkašupmi juhkkojuvvo juohke nuppi jagi muhtun vuoitái Suomas, Ruoŧas, Ruoššas ja/dahje Norggas. Bálkkašupmi juhkkojuvvui vuohččan 2004:s. 

–Ulbmil lea lasihit giellageavaheddjiid logu ja lasihit sámegiela geavaheami buot arenain. Nu sámegielain lea boahtteáigi. Vuoitit leat buorit ovdagovat dasa mot mii sáhttit geavahišgoahtit ođđa gaskkustankanálaid sámegielaid ja kultuvrra várás, dadjá sámediggepresideanta Aili Keskitalo.

Vuitiid birra

Gollegiela jury bálkkaša Máret Steinfjell ja Inga Márja Steinfjell earret eará lullisámi hupmanšovva Steinfjell & Steinfjell ovddas, mii oanehis áiggis lea šaddan smávva giellarevolušuvdnan ja lea dehálaš oassin lullisámi guovllu giellaealáskahttimis.

Gollegiela jury maiddái bálkkaša Kirsi Paltto ja Jan Skoglund Paltto sudno ollu jagiid barggu ovddas ovddidit davvi-, julev-, ja lullisámi sámegielaid. Sudnos lea jagiid mielde, ja lea odne nai, dehálaš doaibma giellaoahpahusmetodaid ja reaidduid ovddideaddjin sihke easkaálgiide ja eatnigielat mánáide, nuoraide ja rávisolbmuide.

Gollegiela giellabálkkašumi geigen dáhpáhuvvá davviriikkalaš ministtar- ja sámediggepresideanttaid čoahkkimis Stockholmas disdaga 08.11.16.

Oktavuođadieđut: Gieldda- ja ođasmahttindepartemeantta preassatelefovdna: +47 22 24 25 00 Sámediggepresideanta Aili Keskitalo, + 47 971 29 305