NRK invtervjuer Aili Keskitalo (Foto Jan Roger Østby)

Sámediggi giellaofelažžan

07. Geassemánnu 2016

Sámediggi bargá beaivválaččat sámegiela nannet ja ovddidit. Dál háliida Sámediggeráđđi oažžut digaštallama Sámedikki iežas giellageavaheami birra.

-Sámedikki áigumuš lea leat giellaofelažžan sámi servodagas. Dan dihte háliidat loktet iežamet giellageavaheami digaštallamii dievasčoahkkimis, lohká Sámedikki presideanta Aili Keskitalo.

Sámedikki giellageavaheapmi meannuduvvo dievasčoahkkimis gaskavahku geassemánu 8. beaivvi. Maŋimuš go Sámediggi meannudii sullasaš ášši lei 1992is, das mearriduvvui earret eará ahte juohkehaš gálgá beassat geavahit sámegiela dievasčoahkkimiin ja sámegiela geavaheapmi reivviin ja dieđáhusain.

-Lea áigi fas loktet giellageavaheami digaštallamii go sámegiela stáhtus lea olu rievdan 1992 rájes. Dáinna dievasčoahkkináššiin háliidat ain eambbo nannet sámegiela geavaheami Sámedikkis, dat guoská dieđusge sihke davvi-, julev- ja máttasámegillii, lohká Keskitalo.

Vuoigatvuohta geavahit sámegiela lea nannejuvvon Sámelágas, Vuođđolágas ja gaskariikkalaš konvenšuvnnain ja šiehtadusain. Vuoigatvuohta sámástit ii leat álo doarvái oaivvilda Keskitalo.

-Sámegielas lea dakkár historjjálaš duogáš mii gáibida maid dihtomielalašvuođa giellageavaheamis. Sámegiella lea olu dilálašvuođain minoritehtas ja dat dahká maid ahte fertet movttiidahttit ja láhčit dili geavahit giela, lohká Keskitalo.

Eanet dieđut. Sámedikki presideanta Aili Keskitalo, 971 29 305