Duodji jođihanfápmun
Giella
Sámegielaid hálddašanguovlu
Háliidat ahte eanet lullisámi suohkanat livčče hálddašanguovllus
Aili Keskitalo_COP21 (Foto Corinne Svala)

Háliidat ahte eanet lullisámi suohkanat livčče hálddašanguovllus

01. Geassemánnu 2016

Sámedikki presideanta Aili Keskitalo cuiggoda go Gielda- ja ođasmahttindepartemeanta ii áiggo meannudit Arborde suohkana ohcama searvamis sámegiela hálddašanguvlui, ovdal go maŋŋá go Sámi giellalávdegoddi lea geargan raporttainis ja raportta čuovvoleapmi lea čielggaduvvon. Vearrámus dilis sáhttá gártat nu ahte suohkan ferte vuordit máŋga jagi ovdal go ohcan meannuduvvo, dadjá Keskitalo.

-Mii leat hui ilus go Arborde suohkan háliida leat mielde ovddideamen ja ovdánahttimin lullisámi giela, ja danne šállošit go stáhtaráđđi Jan Tore Sanner ii áiggo meannudit suohkana ohcama. Dát ii leat movt ge buorre vuohki meannudit suohkaniid mat háliidit laktojuvvot sámegiela hálddašanguvlui, dadjá Sámedikki presideanta Aili Keskitalo.

Keskitalo dadjá ahte Arborde suohkan lea dahkan vuđolaš ovdabarggu ovdal go lea ohcan, ja ovttajienalaš suohkanstivra lea guorrasan sámegiela hálddašanguvlui searvamii.

-Sámedikki mielas lea hui buorre go eanet suohkanat lullisámi guovllus háliidit searvat sámi giela ja kultuvrra nannenbargui, dadjá Keskitalo. Dál leat dušše guokte lullisámi suohkana sámegiela hálddašanguovllus. Eanet suohkaniidda lea sadji, dadjá Keskitalo.

Áitojuvvon giella 

Keskitalo dadjá ahte sámi giellalávdegoddi čállá oasseraporttastis ahte sii eai oainne makkárge ákkaid biehttalit suohkaniid searvamis hálddašanguvlui, vaikko lávdegoddi ii leat geargan čielggadusainis. Vejolaš searvamiin eai šatta stuorra váikkuhusat. Danne ii ipmir Keskitalo mearrádusa maid Gielda- ja ođasmahttindepartemeanta lea dahkan. 

-Arborde suohkan lea Gaska-Norgga sámeskuvlla isitsuohkan mii várra heaittihuvvo, ja danne lea deaŧalaš álggahit doaibmabijuid maiguin nannet ja ovddidit lullisámi giela guovllus, dan sadjái go bargat vuostá giela, dadjá Keskitalo.

-Stáhtaráđđi Jan Tore Sanner addá fuones signálaid eará suohkaniidda mat háliidit ovdánahttit sámi giela, go ii meannut ohcama dadjá, Keskitalo.  

Eanet dieđuid addá: Sámedikki presideanta Aili Keskitalo, 971 29 305