Duodji jođihanfápmun
Giella
Sámegielaid hálddašanguovlu
Nanu ja bistevaš giellaáŋgiruššan mánáid váste
169

Nanu ja bistevaš giellaáŋgiruššan mánáid váste

17. Skábmamánnu 2016

-Mus leat vuordámušat jođánis ja ollislaš čuovvoleapmái Sámi giellalávdegotti čielggadeamis. Ráđđehus ferte vuoruhit barggu, lohká sámediggepresideanta Aili Keskitalo. Dievasčoahkkin meannuda čielggadeami juovlamánus

Sámi giellalávdegoddi, mii vuođđuduvvui go sámediggeráđđi vuolggahii ášši, ovdanbuvttii golggotmánu 10.beaivvi NAČ 2016: Váibmogiella. Lávdegoddi evttoha máŋga láhkarievdadeami ja doaibmabiju nannen ja ovddidandihte sámi gielaid.

Sámediggeráđđi lea ovddidan mearrádusevttohusa Dievasčoahkkimii Sámedikki vuođu ja eavttuid birra viidáset čuovvoleamis giellačielggadeamis.

-Mii vásihit ahte ollu sámi mánát eai oaččo sámi mánáidgárdefálaldaga ja fertejit mannat dáža mánáidgárdái. Árgabeaivvis dat mearkkaša ahte sámi giella váldo sis eret juo ovdal go leat álgime oahppat hupmat. Jus sámegielas galgá leat boahtteáigi de fertejit biddjot johtui nanu ja bistevaš giellaáŋgiruššamat mánáid váste. Rievdadeamit oahpahus- ja mánáidgárdelágain, seammás go biddjo olu ruhta addit duohta ja ovttadássásaš fálaldaga sámegiela ja sámegillii oahppamii miehtá riikka, leat vealtameahttumat sámi gielaid ovdáneapmái, lohká Keskitalo.

-Mun illudan Sámedikki dievasčoahkkima meannudeapmái, mii válbme Sámedikki vuođu ja eavttuid viidáset barggus giellačielggademiin ja mii seammás movttiidahttá ja dahká vejolažžan ollu ja áŋgiris gulaskuddancealkámušaide giellalávdegotti čielggadeapmái, loahpaha Keskitalo.

Eanet dieđuid oaččut:
Sámediggepresideanttas Aili Keskitalo, 971 29 305