Duodji jođihanfápmun
Kultureallin
Dáidda – ja kulturbargu
Árbevirolaš johkafanashuksema čalmmustahttin
Henrik Olsen 2 (Foto: Kenneth Hætta)

Árbevirolaš johkafanashuksema čalmmustahttin

14. Geassemánnu 2016

Sámediggeráđđi juolluda 184 400 ruvnno Sámiid Vuorká-Dávvirat/De Samiske Samlinger:ii RiddoDuottarMuseas Kárášjogas doallat kurssa árbevirolaš johkafanashuksemis, ja dokumenteremii fanashuksenproseassa.

Sámiid Vuorká-Dávvirat/De Samiske Samlinger galgá čohkket ja dokumenteret Sis-Finnmárkku fanashuksenmáhtu birra. Musea háliida seailluhit ja gaskkustit dán máhtu boahtte buolvvaide.

Prošeavtta olahusjoavku leat duojárat, giehtaduojárat ja earát geain lea beroštupmi johkafatnasa historjái, geavaheapmái, huksenteknihkkii, seailluheapmái ja terminologiijii.

Sámediggeráđđi Henrik Olsen lohká ahte prošeakta boahtá addit máhtu johkafanashuksema birra, terminologiija ja máhtu geavaheami ja materiálageavaheami birra.

-Lea dehálaš ahte dát duodjemáhttu seailluhuvvo dál, go eai leat šat gallis geat máhttet dan, lohká Olsen.

Guhtta fatnasa galget huksejuvvot

prošeakta galgá hukset guhtta iešguđet lágan johkafatnasa main lea gullevašvuohta Kárášjoga guovllu čázádagaide. Árbevirolaš bargovugiid ja reaidduid geavaheapmi galget leat guovddážis oahpahusas.

Musea galgá maid kártet ja dokumenteret johkafanasšlájaid dain iešguđet jogain Kárášjogas ja Porsáŋggus.

Prošeakta galgá govvet, filbmet ja jearahallat čohkkenbarggus. Galget čohkket historjjáid johkafanashuksema birra ja johkafanasgeavaheami birra.

Musea čállá ohcamis ahte sii áigot čohkket terminologiija johkafatnasiidda, sihke sámegillii ja kvenagillii. Árbevirolaš máhttu materiálagieđahallama birra fanashuksedettiin ja daid áimmahuššamiin leat maid dehálaš oasit prošeavttas.

Gaskkusteapmi

Maŋŋil čohkkenbarggu áigot dát golbma musea gaskkustit máhtu johkafanashuksenárbevieru birra ná:

- Čájáhus válmmas huksejuvvon johkafatnasiin, ja dan oktavuođas dollojuvvojit seminárat SVD:s Kárášjogas, Porsáŋggu museas ja Guovdageainnu gilišiljus.  

- Neahttačájáhus

-Čohkkejuvvon govat almmuhuvvojit neahttačujuhusas: www.digitaltmuseum.no

-Jearahallamat almmuhuvvojit neahttasiiddus www.digitaltmuseum.no

-Almmuhit gihppaga terminologiijas ja bargoproseassaid birra mat gusket fanashuksemii. 

Eanet dieđuid oaččut: Sámediggeráđis Henrik Olsen, 907 75 219