Duodji jođihanfápmun
Kultureallin
Dáidda – ja kulturbargu
Ásahit seniorstipeandda sámi dáiddáriidda
Henrik Olsen 6 (Foto: Kenneth Hætta)

Ásahit seniorstipeandda sámi dáiddáriidda

09. Skábmamánnu 2016

Sámediggeráđđi ja Sámi dáiddárráđđi háliidit ásahit liige seniorstipeandda sámi dáiddáriidda.

Sámediggeráđđi ja Sámi dáiddárráđđi leat soahpan ođđa rámma 2017 dáiddáršiehtadussii. Eanet ruhta šiehtadusas addá muni ásahit liige seniorstipeandda sámi dáiddáriidda. Rámma lea 7 650 000,- ru.

Šiehtadus ovddiduvvo Sámedikki dievasčoahkkimii loahpalaš dohkkeheapmái juovlamánu álggus.

-Mii leat duhtavaččat go leat geargan boahtte jagi dáiddáršiehtadusain, ja go lea leamaš vejolaš nannet šiehtadusa veaháš, vaikko rámmat eai leatge duohta lasihuvvon Stáhta beales 2017:s, dadjá sámediggeráđđi Henrik Olsen.

Šiehtadusas leat muđui doaibmadoarjja dáiddárorganisašuvnnaide, fágakonsuleanttaide, dáiddafondii, dáiddárstipeanddaide ja čájáhusbuhtadussan. Bealit leat maiddái soahpan joatkit ain girječálliprošeavttain ja bargguin sámi luđiid ja musihkkaeallima ovddidemiin.

-Deaŧalaš lea nannet stipeanddaid min seniordáiddáriidda, go mis lea sohkabuolva boarráset dáiddáriiguin geain lea alla dási dáiddalaš doaibma, ja geat leat deaŧalaš ofelaččat min nuorat dáiddáriidda, dadjá Olsen.

Dáiddáršiehtadus šiehtaduvvo jahkásaččat Sámedikki ja Sámi dáiddárráđi gaskka. Šiehtadallamat leat deaŧalaš arenat oppalaš dáidda- ja kulturpolitihkalaš doaibmabijuid ja hástalusaid ovdánahttimii ja guorahallamii.

Sámediggeráđđi Henrik Olsen lea maiddái duhtavaš ovttasbargguin Sámi dáiddárráđiin ja namuha erenoamážit girječálliprošeavtta mii lea rekrutteren ođđa sámi girječálliid. Girjjálašvuohta lea fokusis ja mii doaivut ahte dat oktiibuot galgá buoridit sámi girjjálašvuođa, dadjá Olsen.

Eanet dieđuid addá:

Sámediggeráđđi Henrik Olsen, tel. +47 907 75 219