Ann-Mari Thomassen 5 (Foto: Kenneth Hætta)

Juolluda ruđaid Beaivvážii

13. Miessemánnu 2016

Sámediggeráđđi evttoha juolludit 1,2 miljon ruvnnu Beaivváš Sámi Našunálateáhterii neavttašit riepmočájálmasa «The Yoik Consert: Eallin mokta – Jielemen aavoe» Tråante 2017 doaluin.

Beaivváš Sámi Našunálateáhter pláne riepmočájálmasa Tråante ávvudeami oktavuođas Troandimis 2017:s. Sis lea ovddasvástádus riepmočájálmasas «The Yoik
Consert: Eallin mokta – Jielemen aavoe».

Sámediggeráđđi Ann-Mari Thomassen dadjá ahte Beaivváš Sámi Našunálateáhter dárbbaša liige juolludusa vai sáhttet čađahit riepmočájálmasa. Ráđđi evttoha várret 1,2 miljon ruvnnu čájálmassii.

Dárbbašuvvo maid čavga čuovvolit prošeavtta Tråante 2017 sihkkarastin dihtii ahte lágideapmi čađahuvvo. Danne háliida ráđđi juolludit 800 duhát ruvnnu 2016 reviderejuvvon bušeahtas prošektii Tråante 2017.

Sámediggeráđđi Ann-Mari Thomassen dadjá ahte Tråante 2017 lea dan min vuosttaš riikkačoahkkima oktasaš 100-jagi ávvudeapmi, mii lágiduvvui Troandimis 1917:s.

-100-jagi ávvudeapmi lea deaŧalaš midjiide njealji riikka álbmogin. Mii háliidit dakkár ávvudeami mii čalmmustahttá ja gaskkusta máhtu sápmelaččaid, sámi giela, kultuvrra ja min oktasaš historjjá birra 100-jagi perspektiivvas. Ávvudeapmi galgá leat mielde nannemin min searvevuođa álbmogin, dadjá
Thomassen.

-Mii illudit ávvudeapmái ja riepmočájálmassii, dadjá Thomassen.

Dievasčoahkkin meannuda reviderejuvvon bušeahta geassemánua.

http://www.sametinget.no/Sametingets-samling
Eanet dieđuid addá sámediggeráđđi Ann-Mari Thomassen, 900 57 123
Loga eanet ávvudeami birra:

http://www.tråante2017.no/