Duodji jođihanfápmun
Kultureallin
Dáidda – ja kulturbargu
Sámedikki čilgehus sámi girjjálašvuođa birra
Henrik Olsen 5 (Foto: Kenneth Hætta)

Sámedikki čilgehus sámi girjjálašvuođa birra

11. Njukčamánnu 2016

Sámediggeráđđi lea bargagoahtán čilgehusain mii galgá geahčadit sámi girjjálašvuođa stuorát oktavuođas ja hábmet eanet ollislaš politihka dan suorggis. Sámedikkis leat iešguđet áŋgiruššamat, ja váikkuhangaskaoamit, girjjálašvuođasuorggis. Čilgehus galgá geahčadit dálá dili girjjálašvuođasuorggis ja hástalusat dan oktavuođas, ja vejolaš mihttomeriid ja strategiijaid sámi girjjálašvuođa viidáseappot ovddideami várás.

- Sámi girjjálašvuohta dárbbaša loktema. Sámi girjjálašvuohta lea hui deaŧalaš go guoská dakkár fikšuvnna gaskkusteapmái, mii lea vuođđuduvvon sámi árvvuide ja jurddašanvuohkái. Girjjálašvuohta váikkuha maiddái gillii, ja lea maiddái deaŧalaš go guoská lohkanmiela movttiidahttimii, dadjá sámediggeráđđi Henrik Olsen.

Sámi girjjálašvuođasuorgi bovdejuvvo buktit gulaskuddancealkámušaid álgogeahčen cuoŋománu. Sámediggi áigu bidjat ovdan ođđa jurdagiid earret eará buvttadangaskaomiid ja jorgalandoarjaga oktavuođas.

- Lea hui deaŧalaš ahte suorgi buktá evttohusaid. Dál lea vejolaš čujuhit rievdadandárbbuid ja evttohit ođđa čovdosiid mat bohtet sámi girjjálašvuhtii buorrin.

Barggu oktavuođas áigu Sámediggi maiddái čađahit lohkkiidiskkadeami nuoramus lohkkiid gaskkas.

- Dat šaddá hui gelddolaš. Lohkkiidiskkadeapmi sámi lohkkiid gaskkas ii leat gossege ovdal dahkkojuvvon. Ja dál mii beassat diehtit maid lohkkit oaivvildit. Sin várás han leat girjjit ráhkaduvvon, loahpaha Henrik Olsen.
Sámediggeráđi áigumuš lea bidjat ovdan čilgehusa Sámedikki dievasčoahkkimii čakčamánus 2016.

Eanet dieđuid addá:

Sámediggeráđđi Henrik Olsen, 907 75 219