Ann-Mari Thomassen (Foto Jan Roger Østby)

Sámi vuoigatvuođa bargu nannejuvvon

-Sámi kultuvrra ja ealáhusbarggu luondduvuđđosii čuohcá hui sakka ovddidandárbu ođđaáigásaš servodaga beales. Danne nanne Sámediggeráđđi doarjaga sámi vuoigatvuođaid, areálaid ja resurssaid čuovvoleapmái ja doarjagii ealáhuseallimii, fitnodatovddideapmái, lotnolas- ja meahcástanealáhusaide 2017 bušeahttaevttohusas, dadjá sámediggeráđđi Ann-Mari Thomassen.

Sámediggeráđđi ovddida Sámedikki 2017 bušeahttaevttohusas maŋŋebárgga skábmamánu 8. b. Bušeahtta meannuduvvo Sámedikki dievasčoahkkimis juovlamánu álggus.

Sámediggeráđđi Ann-Mari Thomassen dadjá ahte ráđđehusa stáhtabušeahttaevttohusas addojuvvo duohtavuođas unnit ruhta sámi ulbmiliidda, mii mearkkaša dan ahte Sámedikkis boahtte jagi lea gáržžes bušeahtta.

-Mis lea dattetge leamaš vejolašvuohta lasáhusaide ja ođđa doaibmabijuide. Sámediggeráđđi evttoha ahte juolluduvvo 1,2 miljon ru doarjjaortnegii mas earret eará addojuvvo juridihkalaš veahkki sámi vuoigatvuođaoamasteddjiide áššiin mat fievrriduvvojit duopmostuoluide, dadjá sámediggeráđđi Ann-Mari Thomassen.
Sámi čuovgatoardna
Sámediggeráđđi áigu joatkit barggus ođđa sámi kulturviesuid duohtan dahkamiin. Bušeahtas ovdagihtii lasihuvvo doarjja Beaivváš Sámi Našunálateáhterii ođđa teáhtervistti čuovvolanbargui. Doarjja Várdobáikái lasihuvvo dan sivas go fárre ođđa lokálaide. Dasa lassin árvala sámediggeráđđi lasihit doaibmadoajaga Sámi Dáiddaguovddážii Kárášjogas.
-Sámi kulturásahusat ja festiválat leat guovddážis sámi servodaga ovddideamis, ja danne evttohit nannet maiddái doarjjaortnega dáidda- ja kulturgaskkustanásahusaide, dadjá Thomassen.

Ealli sámi servodat

Sámediggeráđđi háliida eanet ođđaásahemiid, buoret gánnáhahttivuođa ja eanet árvoháhkama ealáhuseallimis sámi guovlluin. Ráđđi lasiha doarjaga ealáhuseallimii, fitnodatovddideapmái, lotnolas- ja meahcástanealáhusaide.

-Sámi mátkeealáhusat šaddet dađistaga ain deaŧaleappot. Ráđi ulbmilin lea oažžut eanet barggolašvuođa ja buoret gánnáhahttivuođa sámi mátkeealáhusain. Danne ásaha sámediggeráđđi ođđa doarjjaortnega sámi mátkeealáhusaid várás, dadjá Thomassen.

Duođaštit dáruiduhttima

-Dáruiduhttinhistorjá ferte duođaštuvvot, gaskkustuvvot ja dohkkehuvvot. Danne evttoha ráđđi ahte juolluduvvo miljon ru dan bargui ahte oččodit oktasaš áddejumi sápmelaččaid ja norgalaččaid gaskka dáruiduhttima váikkuhusain, ja mainna lágiin sáhtášii bargat dan ala ahte ožžošeimmet bissovaš čovdosiid dán njulgemii ja váikkuhivččii duohta dásseárvvu sámiid ja dážaid gaskka, dadjá sámediggeráđđi Ann-Mari Thomassen.
Sámegiella mánáide ja nuoraide

Sámediggeráđi ulbmilin lea ahte eanet sámi vánhemat vállješedje hállat sámegiela mánáideasetguin. Danne nannet ja joatkit kampánjja “Sámás mánáin”.

-Ollugat vásihit ahte lea váttis válljet, ja danne háliidit váikkuhit dihtomielašvuođa vánhemiid gaskkas giellaválljemis, juohkit dieđuid ja bagadit, ja dasto leat doarjjan vánhemiidda, dadjá Thomassen
-Sámegielat mánáidgárddit leat deaŧalaččat giellaovddideapmái. Sámediggeráđđi evttoha ahte ođđaásahemiid ruhtademiin joatkit ja sámegielat mánáidgárdefálaldaga viiddidemiiguin, dadjá Ann-Mari Thomassen loahpas.

Eanet dieđuid addá:

Sámediggeráđđi Ann-Mari Thomassen, tel. 900 57 123