Sámedikki kulturmuitosuodjalusa ulbmil lea ”suodjalit sámi kulturmuittuid ja kulturbirrasiid dainna lágiin ahte dat váikkuhit nannet ja viidásetfievrridit sámi kultuvrra ja identitehta”.
Kulturmuitolága 4. § nuppi lađđasis boahtá ovdan ahte sámi kulturmuittut, mat leat boarráset go 100 jagi, leat automáhtalaččat ráfáidahttojuvvon. Sámi kulturmuitosuodjaleami barggut ja váldi biddjojuvvojedje čakčamánu 1. b. 1994 Sámi kulturmuitoráđđái. Sámediggi nammadii ráđi njukčamánus 1994 fuolahit sámi kulturmuitosuodjalusdoaimmaid.
2001 rájes lea Sámediggái fápmuduvvon dat hálddašanváldi, mii Sámi kulturmuitoráđis lei 31.12.2000 rádjai. Sámediggi hálddaša sámi kulturmuittuid kulturmuitolága mielde, ja fuolaha sámi kulturmuitoberoštumiid plána- ja huksenáššiin plána- ja huksenlága mielde. Sámedikki hálddašaválddi geográfalaš ovddasvástádusguovlu lea Hedmárkku rájes máddin gitta Finnmárkku rádjai davvin.
Sámi kulturmuittuid ja kulltureanadagaid, deaŧalaš historjjálas, kultuvrralaš ja identihtii guoski árvun, ferte erenoamážit váldit vuhtii areálaplánabarggus. Dárbbaša maiddái systemáhtalaččat registreret sámi kulturmuittuid, maidda maiddái gullet visttit ja kultureanadagat oassin areálabarggus.
Sámediggi fállá čuovvovaš bálvalusaid:
• áššemeannudeami ja bagadallama plána- ja huksenlága ja kulturmuitolága oktavuođas
• diehtojuohkima, oaivadeami ja bagadallama sámi kulturmuittuid, kulturbirrasiid ja kulturhistorjjá birra
• dieđuid sámi kulturmuittuid ja kulturbirrasiid hálddašeami ja suodjaleami birra, oktan sámi visttiiguin
• bagadeami doarjjaohcamiid oktavuođas sámi kulturmuitosuodjalemiide
• dieđuid, oaivadeami ja bagadeami sámi museaid oktavuođas
• bagadeami doarjagiid birra sámi museaide ja museadoaibmabijuide
• dieđuid, oaivadeami ja bagadeami birasgáhttema ja báikkálaš Agenda 21 oktavuođas
• beassama min fágagirjerádjui ja min kulturhistorjjálaš vuorkkáide min kánturbáikkiin lagat šiehtadusa mielde
Riikkaantikvára lea kulturmuitohálddašeami ovddasvástideaddji direktoráhta Norggas.
Váldde oktavuoda guovllukantuvrraiguin
Finnmárkku guovlukantuvra lea Várjjat sámi musea Vuonnabađas, Romssa guovlukantuvra lea polarbirasguovddážis Romssas, davit Nordlándda guovlukantuvra lea Árranis Ájluovttas Divttasvuonas ja oarjelsámi guovllu guovlukantuvra lea Saemien sijtes Snoasas Davvi-Trøndelágas.