Listtu sáhttá geavahit dalle go skuvla galgá hukset alccesis ávnnasčoakkáldaga ráhkkanahttit ja čađahit oahpahusa 10-jagi vuođđoskuvlla oahppoplána ektui. Mii fuomášuhttit ahte listtuin gávdno okta fáddágirji mánáidgárddiid váste. Mii leat válljen váldit girjji mielde danne go dat sáhttá leat heivvolaš nuoramus ohppiide.
Listtut leat oaivvilduvvon dušše oaivadussan ja dat galget čujuhit maid sáhttá skáhppot, ja dasto leat váldán mielde muhtun boarraset tihttaliid maid sáhttá luoikkahit bibliotehkas. Tihttaliid main lea ISBN-nummir, sáhttá skáhppot girjegávppiid bokte.
Eará girjjiid sáhttá skáhppot go váldá oktavuođa almmuheaddjiin (geahča čujuhuslisttu). Nugo oidno listtuin, de leat ovttaskas tihttaliin mielde máŋga fága. Dát ávdnasat sáhttet leat vuođđun bibliotehkas ja go áigu oastit de lea buoremus daid válljet.
O97:s lea dárkilastojuvvon ahte buot fágain, earret matematihkas, galget leat fágaávdnasat sámi sisdoaluin. Ovdamearkan sáhttit namuhit dárogiel fága nuppi luohkáide: Oahpahusas galget oahppit beaivválaččat gullat cukcasiid ja muitalusaid dahje eará teavsttaid mat lohkkojuvvojit jitnosit, ovdamearkka dihte Asbjørnsen ja Moe cukcasiin (...), sámi cuvccasčoakkáldagat(s.118), ja dáidagis ja giehtaduojis 9. luohkáide: Oahpahusas galget oahppit (...), ja hárjehallat geavahit impulssaid báikkálaš ja našuvnnalaš stiilaárbevieruin, earret eará sámi (s. 202).
Vuolábealde gávnnat geahčastaga áigeguovdilis áššebáhpiriin sámiid diliid birra. O97:s čuožžu álggahusas Prinsihpat ja njuolggadusast ahte Sámegiella lea okta oassi oktasaš norgalaš ja davviriikkalaš kultuvrras masa buot oahppit galget oahpásmuvvat, ja ahte sámi kultuvra, giella, historjá ja servodateallin leat danne okta oassi oktasaš oahpahusávdnasiin iešguđet fágain.
Dát mearkkaša dan ahte skuvllain lea geatnegasvuohta skáhppot girječoahkádusaid ja eará oahpahus- ja duogášávdnasiid, maid vuođul lea vejolaš fállat buori oahpahusa sámiid ja sámiid diliid birra.