Mii lea Giellalokten?

Sámedikki strategiijat sámegielaid várás

Ođas | Almmuhuvvon , ođasmahtton

Sámegielain lea stuorra mearkkašupmi ovttaskas giellageavaheaddjái, sámi álbmogii ja sámi servodaga ovddideapmái. Sámegielain ii leat dušše sáhka gulahallamis, muhto dain lea lagas čatnaseapmi sámi identitehtii, kulturárbái ja gullevašvuhtii. Sámegielat govvidit min oktavuođa, min árbbi ja čanasteami min máttuide. Giella duddjo gullevašvuođa, beroškeahttá das guđe sámegiela mii máhttit dahje man ollu dahje unnán mii giela máhttit.

Danne lea sámi giellapolitihkas sáhka sihke das ahte váidit ruovttoluotta massojuvvon giela ja das ahte ovddidit sámegielaid dain guovlluin gos sámegiella geavahuvvo beaivválaččat. Vaikke vel gielladilit leat iešguđetláganat, de giella čatná min oktii dan oktasaš sávaldaga bokte ahte mii háliidit gáhttet, ovddidit ja nannet sámegiela. Sámi giellapolitihkas lea maid sáhka rámmaeavttuin, láhkareguleremiin ja giellageavaheddjiid árgabeaivvis. Sámegiella guoská buot servodatsurggiide, ja dat ferte buori giellapolitihkas oidnot.

Sámediggi háliida ahte sámegielat galget gullot, geavahuvvot ja oidnot servodagas, ja Sámedikki giellastrategiija – Giellalokten čalmmustahttá oainnusmahttima, ovddideami, rekrutterema ja gealboloktema buot dásiin. Erenoamážit áŋgiruššat giellafálaldagaiguin mánáide ja nuoraide. Giellalokten čalmmustahttá maiddái ovttasbarggu ja ovttastahttima daid ásahusaid, orgánaid ja organisašuvnnaid gaskka mat barget sámegielaiguin.

Min višuvdna lea ahte sámegielat galget lunddolaččat gullat servodahkii, ja ahte buohkain galgá leat vejolašvuohta gullat, oaidnit ja geavahit sámegielaid buot servodatsurggiin. Sámegielat galget lunddolaččat gullat sihke sáme- ja dárogielagiid juohkebeaivválaš dillái.

Sámedikki giellabargu lea vuođđuduvvon guhkesáiggi bargui ja čuovvula NAČ 2016:18 Váibmogiella. Min strategiijat sámegielaid várás galgá leat Sámedikki stivrendokumeanta Váibmogiela viidásat čuovvuleapmái.

Bajimus mihttomearit Sámedikki giellastrategiijii – Giellaloktemii leat:

  • Ovttadássásaš ja ovttaárvosaš gielat
  • Oidnosis ja servodatguoddi gielat

Dán strategiijas deattuhuvvojit 3 bajimus áŋgiruššansuorggi:

  • Giellafálaldagat mánáide ja nuoraide
  • Oainnusmahttin ja ovttasbargu
  • Rekrutteren ja gealbolokten

Viečča Giellalokten-dokumeanta min neahttasiiddus jus áiggut eambbo dieđuid

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!