Báhčči, taekwondo-valáštalli, ja slampoehta ja musihkkár ožžot Sámedikki kultur- ja valáštallanstipeandda

Báhčči Benedicte Guttorm, taekwondo valáštalli Sajane Karina Olsen, slampoehta Anna Kaisa Partapuoli ja musihkkár Johan Daniel Turi ožžot Sámedikki kultur- ja valáštallanstipeandda.

stipend.jpg

Anna Kaisa Partapuoli (foto: Aili Elisa Thomassen), Benedicte Guttorm, Sajane Karina Olsen (foto: Ørjan Bertelsen), Johan Daniel Turi (foto: Marie Louise Somby)

Ođas | Almmuhuvvon , ođasmahtton

Sámedikki presideanta Aili Keskitalo sávvá lihku vuitiide. Son dadjá ahte buot vuoitit leat buorit ovdagovat sin valáštallamis ja kultursuorggis.

– Buot stipeandavuoitit čájehit ahte áŋgiruššet iežaset suorggis ja sii čájehit buriid bohtosiid, báikkálaččat, regionála ja nationála dásis. Buohkat leat árvvolaš stipeandavuoitit ja leat buorit ovdagovat earáide, dadjá Sámedikki presideanta Aili Keskitalo.

Stipeanda galgá movttiidahttit nuoraid

Sámedikki kultur- ja valáštallanstipeanda galgá movttiidahttit sámi nuoraid áŋgiruššat dáidaga, kultuvrra ja valáštallama siskkobealde. Njeallje 25 000 ruvdnosaš stipeandda juhkkojuvvojit. Stipeanda galgá addojuvvot ovttaskas olbmuide goappašiin sohkabeliin. Sii guđet ožžot stipeandda galget leat 16 ja 25 jagi gaskka dan jagi go stipeanda addojuvvo.

Bohte 20 ohcamuša, muhto okta ohcamiin bođii áigemeari maŋŋá. 12 ohcci ohce valáštallanstipeandda ja čiežas ohce kulturstipeandda.

Valáštallanstipeandda vuoitit

Sámedikki presideanta Aili Keskitalo dadjá ahte báhčči Benedicte Guttorm ja taekwondo-valáštalli Sajane Karina Olsen leaba ožžon buriid bohtosiid miehtá sesoŋgga, ja goappašagat leaba njunnošis iežaska valáštallamiin sihke regionála ja nationála dásis. Soai leaba buorit ovdagovat sámi nuoraide geat háliidit áŋgiruššat valáštallamiin.

Benedicte Guttorm lea bures ovdánan iežas valáštallansuorggis, ja lea olahan hui buriid bohtosiid sihke regionála ja nationála dásis. Dán jagáš Riikabáhčingilvvuin Stjørdálas vuittii son fealtabáhčima boarráset junioraid gaskkas ja bođii nuppi sadjái bánabáhčimis.

Sajane Karina Olsen lea gilvalan regionála, nationála riikkaidgaskasaš dásis surggiin, dárogillii mønster ja sparring. Son lea ožžon buriid bohtosiid ja lea ožžon máŋga NNM-, NM ja World Cup-medálja. Son háliida ovddidit viidáseappot taekwondo-valáštallama, ja áŋgiruššá ollásit. Son lášmmohallá árjjalaččat vahkkosaččat, dasa lassin oahpaha son nuorat valáštalliid. Dál lea sus čáhppes boagán su valáštallamis.

Kulturstipeandda vuoitit

– Anna Kaisa Partapuolis ja Johan Daniel Turis leat goappašagain dáiddárattáldagat. Nubbi lea beaggigoahtán slampoesiijain, ja nubbi fas lea bargagoahtimin iežas kultursuorggis. Goappašagat leaba čájehan nana áŋgiruššama, ja bargaba olles váimmuin iežaska kultursuorggis. Soai leaba buorit ovdagovat sámi nuoraide geat háliidit áŋgiruššat dáidagiin ja kultuvrrain, dadjá Sámedikki presideanta Aili Keskitalo.

Anna Kaisa Partapuoli lea máŋggabealat kulturbargi, ja oahpu lassin bargá son dáidagiin ja dujiin. Partapuoli lea dohkkehuvvon slam-poehta sámi servodagas, ja válljejuvvui 2018:s jagi nuorra dáiddárin Riddu Riđđu-festiválas. Sáhttá dadjat ahte sámi slampoesiija lea ođas sámi girjjálašvuođa ja kulturbarggu siskkobealde. Son bisuha maiddái árbevirolaš duoji eallin, ja háliida áiggi mielde oažžut birgejumi dáidagis ja kultuvrras.

Johan Daniel Turi váldá oahpu dahkki klassihkalaš musihkas NTNU:s Troanddimis. Sus lea stuorra beroštupmi ráhkadit sámi musihka ja lea ovdal bargan ásahuvvon musihkkáriiguin. Turis leat plánat boahtteáigái maŋŋá oahpu, ja áiggošii áŋgiruššat ollásit kultuvrrain.

Eanet dieđuid addá Sámedikki presideanta Aili Keskitalo, 971 29 305

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!