Sámediggi galgá buktit cealkámuša Duohtavuođa- ja seanadankommišuvnna mandáhtii maid Stuorradiggi lea nammadeamen. Mii háliidit ahte dán barggu vuođđun galgá leat sámi servodat ja bovdet rabas čoahkkimiidda vai beassat gullat álbmoga oainnuid (geahča listtu vuolemusas artihkkalis gos ja goas čoahkkimat leat).

Dakkár kommišuvdna mii šattašii deaŧalažžan ja oččošii buori saji servodagas sáhtášii leat reaidun miellaguottuid rievdadeamis. Danne lea deaŧalaš gávdnat guđe servodatsurggiide kommišuvnna bargu galgá guoskat. Leat go giella, kultuvra ja dearvvasvuohta deaŧalepmosat, vai leat go du mielas eará suorggit mat leat seamma deaŧalačča? Maid galggašii kommišuvdna du mielas gieđahallat ja mainna galggašii dat bargat. Mii háliidit gullat maid don oaivvildat dán birra, ja dan sáhtášit muitalit jus buvttát cealkámuša rabas čoahkkimiin dahje sáddet e-poastta dán čujuhussii: duohtavuohta@samediggi.no.

Sámediggi diehtá ahte sámi álbmot lea gillán stáhtalaš dáruiduhttinpolitihkka geažil, mii bisttii eambbo go 100 jagi. Ollu sápmelaččain leat ain hávit maid dáruiduhttin lea dagahan, sihke ovttaskas olmmožin ja servodahkan. Deaŧalaš oassi seanadeamis lea oktasaš áddejupmi historjjás, ovddeš áiggi vuoiggalašvuođas ja eahpevuoiggalašvuođas mas sáhttá leat mearkkašupmi otne ge, ja govain historjjá sevdnjes beliin vealahemiin ja illastemiin mat leat dagahan guhkesáiggi váikkuhusaid. Doarvái buori seanadeami lea váttis olahit ovdal go duohtavuođa lea ásahan ja duođaštan nu bures go lea vejolaš, ja ovdal go sihke eiseválddit ja álbmot áddejit mii lea dáhpáhuvvan ja mo ovddeš politihkka lea váikkuhan maŋit buolvvaid.   

Áigumuššan galggašii leat dárkilis čielggadeapmi mii addá autoritehta čuovvuleami doaibmabijuide. Seanadanbarggu oktavuođas lea deaŧalaš ahte sii geat iešguđet láhkai vásihedje dáruiduhttima  ja gillájedje dan geažil besset muitalit iežaset muitalusaid. Kommišuvnnas lea sáhka ásahit ođđa máhtu ja máhttogaskkusteami mii dahká vejolažžan áddet dálá servodaga Norggas.

Loga maid: Stuoradikki mearrádus duohtavuođa- ja seanadankommišuvnna birra

Loga maid: Sámediggi doarju duohtavuođa- ja seanadankommišuvnna

Loga maid: Kronihkka: Ollugat guddet ain sohkabuolvvaid ja iežaset lossa nođiid

Sámediggi bovde rabas čoahkkimiidda:

Guovvamánu 12. b., dii. 18.00, Ä´vv Saa’mi Mu’zei, Njávdán
Guovvamánu 13. b., dii. 18.00, Várjjat Sámi Musea, Vuonnabahta
Guovvamánu 15. b., dii. 18.00, Álttá Sámi Giellaguovddáš, Áltá
Guovvamánu 21. b., dii. 19.00, Gjenreisningsmuseet, Hámmárfeasta
Guovvamánu 22. b., dii. 18.00, Davvi álbmogiid guovddáš, Gáivuotna
Njukčamánu 1. b., dii. 19.00, Sámi Viessu, Oslo
Njukčamánu 5. b., dii. 18.00, Sámiid Vuorká-Dávvirat, Kárášjohka
Njukčamánu 12. b., dii. 18.00, Ráđđeviesu suohkanstivrralanjas, Romsa
Cuoŋománu 3. b., dii. 18.00, LES-viessu, Guovdageaidnu
Cuoŋománu 9. b., dii. 18.00, Fjellkysten Gjestehus, Loabágis
Cuoŋománu 10. beaivvi, dii 18.00, Várdobáiki, Evenášši
Cuoŋománu 11. beaivvi, dii. 18.00, Árran, Divtasvuodna
Cuoŋománu 12. beaivvi, dii. 18.00, Stormen girjerájus, Bådåddjo
Cuoŋománu 16. beaivvi, dii. 16.00, Saemien Sijte, Snåase
Cuoŋománu 17. beaivvi, dii. 18.00, Aajege Saemien gïele- jïh maahtoejarnge, Röörose

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!