– Duhtavaš ON čeardavealahanlávdegotti ávžžuhusaiguin

ON čeardavealahanlávdegoddi doarju máŋga ášši maid Sámediggi ovddidii lávdegoddái. Sámediggepresideanta Aili Keskitalo vuordá ahte Norga čuovvula ON ávžžuhusaid.

Ođas | Almmuhuvvon

Norga guluhuvai ON čeardavealahanlávdegottis (CERD) juovlamánu 5. ja 6. b. Geneves. Gulaskuddama vuođđun lei earret eará Norgga áigodatraporta ja Sámedikki iežas raporta CERD:i. Sámediggepresideanta Aili Keskitalo lea duhtavaš go lávdegoddi čuovvulii olu dain áššiin maid Sámediggi lei deattuhan. 

– Mii ovddideimmet sihke min raporttas ja min barggus Geneves ahte sámi nissonat vásihit eambbo fysalaš, psyhkalaš ja seksuálalaš veahkaválddálašvuođa go earát. Mun lea ilus go CERD, seamma ládje go máŋga eará ON-orgána ja Norgga nationála olmmošvuoigatvuođaásahus, čielgasit ávžžuhit Norgga ráhkadit doaibmaplána mot dáinna veahkaválddálašvuođaváttuin galgá birget, dadjá sámediggepresideanta.

Sámediggeráđi politihkalaš ráđđeaddi Eirik Larsen searvvai gulaskuddamii Geneves, gos lávdegoddi ovddidii olu gažaldagaid Norgii sámi diliid birra.

Doarju boazodoallolága geahčadeami 

CERD goziha mot stáhtat čuovvulit ON-konvenšuvnna mearrádusaid, mat gildet vealaheami čearddalašvuođa, liikeivnni, čearddalaš gullevašvuođa dahje nationála gullevašvuođa vuođul, ja ovdalaš vahkkoloahpa ovddidii CERD iežas ávžžuhusaid stáhtaide. Lávdegotti raporttas Norgii sii ávžžuhit earret eará bidjat johtui doaimmaid mat galget buoridit sámi eanarivttiid, guolásteami ja boazodoalu rievttálaš rámmaid.

– Lávdegoddi oaivvilda, nu go maiddái mii oaivvildit, ahte mii fertet geahčadit boazodoallolága. Mun lean maiddái duhtavaš go lávdegoddi čielgasit dadjá ahte mearrasámiid historjjálaš guolástanriekti ferte nannejuvvot lágas, dadjá Keskitalo.

Lassin buvttii lávdegoddi čuovvovaš ávžžuhusaid:

  • sihkkarastit ahte duopmostuoluin lea gelbbolašvuohta sámi diliid birra, sihkkarastit gelbbolaš dulkoma riektebálvalusas ja joatkit rekruteret sápmelaččaid riektebálvalussii
  • sihkkarastit olámuttus dulkkaid ja kvalitehta dulkomis almmolaš bálvalusain
  • čuovvulit Sámi vuoigatvuođalávdegotti 2 čielggadeami eana- ja resursavuoigatvuođaid birra olggobealde Finnmárkku
  • bidjat johtui doaimmaid ásahan dihte nuortalašsámiid boazodoalu ođđasis
  • vástidit Sámi Parlamentáralaš Ráđi vuosteákkaid Davviriikkalaš sámekonvenšuvdnii ja sihkkarastit ahte konvenšuvdna dohkkehuvvo  

– Mus leat čielga vuordámušat ahte Norga váldá ON čeardavealahanlávdegotti ávžžuhusaid duođalažžan, ja sámediggeráđđi áigu loktet dáid ávžžuhusaid gullevaš departemeanttaide, loahpaha sámediggepresideanta.

Gulahallanolmmoš: Sámediggepresideanta Aili Keskitalo, tlf. 971 29 305

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!