Gaskavahkku borgemánu 2. b. 2017 lei sámediggeráđis Inger Eline E. Fjellgrenas čoahkkin ovddasteddjiin Fiettar-orohagas. Doppe sii ságastalle man láhkai ovddasguvlui ovttasbargat caggan dihtii ruvkeplánaid Riehpovuonas.

– Mii leat ovttaoaivilis ja doarrut searválaga ruvkedoaimmaid vuostá. Sámedikkis leat olu ákkat manne ii sáhte álggahit ruvkke Riehpovutnii, ja okta dain lea ahte dat dovdá eret boazodoalu guovllus.

Dál lea ášši Mineráladirektoráhtas ja ohcamuš doaibmalohpái lea almmolaš gulaskuddamis. Jus Sámediggi dahje FeFo hilgu doaibmalobi de ferte Ealáhus- ja guolástusdepartemeanta meannudit ášši. Jus sii juolludit doaibmalobi, sáhttá Sámediggi dán mearrádusa guoddalit Ráđđehussii. Minerálalága vuođul galgá sámi kultuvrra, boazodoalu, ealáhusdoaimmaid ja servvodateallima mearkkašahtti olu deattuhit doaibmaohcamuša meannudeamis.

– Mii áigut dieđusge albmaláhkái čuovvulit dán ášši minerálalága ja Finnmárkolága vuođul. Jus stáhta eiseválddit eai veardit ášši nu mo galget lága mielde, de fertet ášši guoddalit gaskariikkalaš olmmošvuoigatvuođaorgánaide ja Norgga duopmostuoluide. Jus nu lea dárbu, de ovttasbargat mii orohagain dán barggus, dadjá Fjellgren.

– Dál lea bággu ahte eiseválddit váldet duođas ahte Finnmárkku álbmot lea vuostá ruvkedoaimmaid ja dan mii Norgga lágas čuožžu. Sii fertejit dál loahpahit dáid ruvkeplánaid. Fiettar-orohagas leat dál geavahan ovcci jagi dán áššái, ja áddemis sii baicce áiggošit geavahit áiggi ja bargonávccaid siiddastallat ovdal go soahtat Stáhta vuostá, loahpaha sámediggeráđđi Inger Eline Eriksen Fjellgren.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!