PRD: Addá doarjaga ovddidanprošektii mii galgá nannet eanadoalu Omasvuonas

Sámediggeráđđi lea juolludan 300 000 ru doarjjan Omasvuona suohkanii prošektii «Styrking av landbruket i Storfjord».

Ođas | Almmuhuvvon

Dát lea golmma jagáš prošeakta mas mihttomearrin lea bisuhit ja eanedit dáláš buvttademiid árbevirolaš eanadoalus, nannet ealáhusvuođu lasseealáhusaid bokte, buoridit aktivitehta meahccedoalus ja váldit eanet árvvuid doalu ja gili buktagiid nállašuhttima bokte.

IMG_E3390.JPG

Sámediggeráđđi Silje Karine Muotka

FOTO | Åse M.P. Pulk/Sámediggi

Eanadoalus Omasvuonas lea leamaš hui heajos ahtanuššan ollu jagiid badjel. Danne lea Omasvuona suohkan čađahan ovdaprošeavtta geahčadan dihtii vejolašvuođaid movt nannet eanadoalu suohkanis. Bohtosat čájehit ahte suohkanis lea stuorra vejolašvuohta ovddidit eanadoalu. Dát guoská sihke árbevirolaš eanadollui šibitdoaluin, šaddadeapmái, meahccedollui ja bioenergiijai, ja lassiealáhusaide nugo mátkeealáhusaide.

Sámediggeráđi Silje Karine Muotka (NSR) mielas lea buorre go Omasvuona suohkan dál áigu čuovvolit prošeavtta mii vuođđuduvvo daid lohpideaddji bohtosiidda mat bohte ovdan ovdaprošeavttas.

– Eanadoallu suohkanis lea ealáhus mii lea deaŧalaš ássama bisuheapmái ja váikkuha ovddideapmái suohkanis. Ovdaprošeavttas mii lea čađahuvvon boahtá albmosii ahte ollu nuorain lea beroštupmi váldit oahpu eanadoalus ja čájehit beroštumi háhkat alcceseaset boahtteáiggi eanadoalus, dadjá Muotka.

Doarjja lea juolluduvvon doarjjaortnegis vuođđoealáhusat. Dán doarjjaortnega mihttomearrin lea bargosajiid lasiheapmi vuođđoealáhusain jagi 2025 sisa. Doarjagiin mat mannet eanadollui vuoruhuvvojit dán jagi divodeamit ja laktavisttit dáláš návehiidda, láhčči doaibmabijut ja prošeavttat mat váikkuhit rekrutterema, buoret árvoháhkama ja ovdáneami eanadoalus.

– Mus lea stuorra jáhkku dasa ahte prošeakta addá positiiva ovdáneami eanadoalus Omasvuonas ja erenoamáš deaŧalaš lea go nuorat válljejit áŋgiruššat eanadoalus, ja ahte láhččojuvvo nu ahte nuorat sáhttet háhkat boahtteáiggi eanadoalus, dadjá sámediggeráđđi Silje Karine Muotka.

Gažaldagaide vástida dahje addá jearahallama sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!