Ohcamušás deattuha joatkkaskuvla ahte sin árbedihtoprošeakta galgá boahtit buorrin mánáide mánáidgárddis gitta joatkkaskuvlladássái, ja maiddái oahpaheddjiide ja earáide geat beroštit sámi kulturárbbis ja árbevirolaš sámi meahccegeavaheamis.

– Dát prošeakta lea min mielas gelddolaš doaibma mii boahtá loktet oidnosii sámi eanadoalu ja meahcástallama árbevieruid. Doaibma boahtá sajáidahttit árbevirolaš máhtu sámi servodagas ja nu nagodit nanusmáhttit sámi identitehta, giela ja kultuvrra mánáin ja nuorain, dadjaba Sámedikki ráđđelahtut Mikkel Eskil Mikkelsen ja Berit Marie P. E. Eira.

Sámediggi oaidná ahte Deanu joatkkaskuvla áigu ovttasbargat máŋggáid báikkálaš verddiiguin ja dát čájeha ahte doaibma lea ruohtastuvvon Deanu guovllus. Doarjja addo Regionálaovddidanprošeavttaid doarjaga bokte.

– Prošeavtta ulbmil lea maid gaskkustit sámi meahcásteami kulturárbbi joatkkaskuvlla bokte ja sii áigot áŋgiruššat oažžut sámi árbedieđu eanandoalus oahppoplánaide. Dat čájeha hirbmat mávssolaš áigumušaid sis dáinna prošeavttain, lohkaba ráđđeláhtu guovttos Eira ja Mikkelsen. Soai áiguba maid vuolgit Detnui dalle go prošeakta álggahuvvo.

Jos leat jearaldagat dahje áiggut jearahallama, de váldde oktavuođa ráđđeláhtuin Mikkel Eskil Mikkelsenain, mob.+47 91742161, dahje ráđđeláhtuin Berit Marie P. E. Eirain, mob. +47 91328626.

 

 

 

 

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!