PRD: Deanu kulturskuvla/sámi mánáidteáhter oažžu doarjaga ovddidanprošektii

Sámediggeráđđi addá 150 000 ru doarjjan Deanu kulturskuvlla Sámi mánáidteáhterii. Sis lea ovddidanprošeakta man ulbmilin lea sáhttit fállat kulturfálaldaga alla dásis mánáide ja nuoraide.

Ođas | Almmuhuvvon

– Sámi mánáidteáhteris Deanus lea juo buorre fálaldat mánáide ja nuoraide, ja sis lea buot jagiid leamaš fokusis sámi dáidda, kultuvra ja giella iežas fálaldagain. Lea illudahtti go sii háliidit ovdánit ain eanet ja buoridit iežaset fágalaš gelbbolašvuođa, dadjá sámediggeráđđi Silje Karine Muotka (NSR).

IMG_E3410.JPG

Sámediggeráđđi Silje Karine Muotka

FOTO | Govven: Åse M.P. Pulk/Sámediggi

Prošeakta lea buvttadeamen ja ráhkada stuorát čájálmasa ođđa Deanu šalddi rahpama oktavuođas ja vižžojuvvojit ámmátlaš dáiddárat ja kulturbargit geain lea báikkálaš ja regionála gullevašvuohta. Dainna lágiin sáhttet sii ovttastahttit nu ahte oažžut áigái sihke stuorát čájálmasa ja seammás buoridit gelbbolašvuođa sihke Sámi mánáidteáhtera bargiid gaskkas, muhto maiddái mánáid ja nuoraid gaskkas geat servet buvttadeapmái.

Sámi mánáidteáhter lea ásahus mii lea organiserejuvvon kulturskuvlla vuollásažžan Deanus, ja olahusjoavkun leat Deanu mánát ja nuorat. Teáhter geavaha sihke sámi kultuvrra ja giela čájálmasas, maid ovdal ge leat geavahan iežaset buvttademiin.

– Deanu kulturskuvla bargá ulbmildiđolaččat nu ahte sámegiella galgá oidnot, gullot ja geavahuvvot mánáid ja nuoraid gaskkas. Sii barget hui buori barggu, dadjá Muotka.

Ruđat juolluduvvojit doarjjaortnegis Regionálaovddidanprošeavttat. Prošeakta dávista ortnega mihttomearrái, “Árjjalaš ja ulbmillaš ovttasbargu regionála ja báikkálaš eiseválddiiguin nannen ja ovddidan dihtii sámi kultuvrra, giela ja servodateallima”.

Jearaldagaide vástida dahje addá jearahallama sámediggeráđđi Silje Karine Muotka (NSR), 984 87 576, silje.karine.muotka@samediggi.no

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!