PRD: Doarjja prošektii mas leat mielde nuorra duojárat

Sámediggeráđđi lea juolludan 100 000 ruvnno doarjjan Duodji Dreamers prošektii Riddu Riđđu oktavuođas.

Duodji Dreamers bilde av utøverne.jpg

Duojárat Duodji Dreamers-prošeavttas bajemusas gurut guvlui: Lisa Lyngman Gælok , Niká Pittja, Merethe Kuhmunen, Ove Stødle, Laila Mari Brandsfjell, Sara Inga Utsi Bongo, Milana Sapelnikova, Patric Jonsson, Sandra Márjá West ja Anniina Turunen.

Riddu Riđđu preassagovva

Ođas: Almmuhuvvon , ođasmahtton

Duodji Dreamers lea dáiddačájáhus gos 10 duojára gaskal 20 ja 35 jagi reflekterejit duoji otnáš ođđaáigásaš servodagas ja duohtavuođas. Čájáhusas lea fokus ceavzilisvuođas. 10 duojára leat válljen guhtege dahkosa Sámi Dáiddamagasiinna čoahkkádusas inspirašuvdnan ođđa dahkosii maid ieža leat dahkan. Sihke dagus mii lea sin inspirašuvdna ja ođđa dagus leat oassin čájáhusas.

IMG_E3410.JPG

Sámediggeráđđi Silje Karine Muotka

Foto: Åse M.P. Pulk/Sametinget

– Sámediggeráđđi oaidná ahte prošeakta sáhttá rahpat uvssaid duoji oainnusmahttimii, go festivála lea stuoris ja go doppe fitnet ollu guossit, de sáhttá prošeavttas leat positiiva váikkuhus duodjeealáhussii rekrutteremii, dadjá sámediggeráđđi Silje Karine Muotka.

Duodji Dreamers lea ovttasbargu Riddu Riđđu, Davvi álbmogiid guovddáža ja Sámi Dáiddamagasiinna gaskka, ja čájáhus rahppojuvvo Riddu Riđđu festiválas suoidnemánu 11. b. Duojárat servet maiddái paneladigaštallamii lávvardaga suoidnemánu 14. b. gos muitalit maid ceavzilvuohta mearkkaša sidjiide go barget dujiin, ja movt duoji sáhttá ovddidit ja geas lea vuoigatvuohta ovddidit duoji.

Maiddái Romssa fylkkasuohkana árvvoštallama mielde lea prošeakta hui buorre ja dávista ovttasbargošiehtadusa mii dain lea Sámedikkiin, mihttomeriide movt movttiidahttit ja rekrutteret nuorra sámi duojáriid, ja lea danne juolludan 30 000 ruvnno prošektii.

– Mii doaivut maiddái ahte Finnmárkku fylkkagielda attášii doarjaga prošektii, dadjá Muotka.

Gažaldagaide vástida ja jearahallama addá sámediggeráđđi Silje Karine Muotka, tel. 98487576.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!