PRD: «Faamoe» almmuhuvvo – áidnalunddot vejolašvuohta sámi fitnodagaide

Sámediggi álggaha ođđa fitnodatovddidanprográmma «Faamoe» hutkás ealáhusaid várás Sámis. Mihttomearrin lea buoridit dietnasa mearkagálvvu ja vuovdima fokuseremiin. Prográmma loahpahuvvo searvamiin Oslo Design Fair 2020 lágideapmái.

Ođas | Almmuhuvvon

«Faamoe» mearkkaša fápmu ja váldi máttasámegillii ja lea prográmma sámi hutkás fitnodagaid várás geat háliidit buoridit gánnáhahttivuođa ja ahtanuššama. Vuosttaš prográmmas lea fokus fitnodagaide mat buvttadit dávviriid ja stohpočiŋaid.

- Sámedikki mihttomearri hutkás ealáhusain lea ahte eanet aktevrrat mat dahket gievrras ja gánnáhahtti fitnodagaid birgejit buorebut. Danne almmuhit mii prográmma mii heive dasa, dadjá sámediggepresideanta Aili Keskitalo.

Individuála čuovvuleapmi

«Faamoe» oktavuođas áigu rehketdoallodoaimmahat analyseret daid fitnodagaid rehketdoalu mat váldojuvvojit mielde prográmmii ja buktet buoridanevttohusa gánnáhahttivuhtii. Dát lea áidnolunddot vejolašvuohta sámi fitnodagaide.

- Buot fitnodagain leat sierra dovdomearkkat eaige leat ovttaláganat. Danne orru min mielas dárbu individuála dásis čuovvulit iešguđege fitnodagaid, dadjá sámediggepresideanta.

«Faamoe» oktavuođas ožžot fitnodagat bagadusa mearkagálvohuksemis movt vuovdit ja viiddidit profešonealla fierpmádaga. Ohcanáigemearri sámi fitnodagaide ohcat searvat «Faamoe» prográmmii lea geassemánu 11. b. 2019 ja ohcanskovvi gávdno min neahttasiidduin ja Sámedikki Facebook-siiddus.

Gánnáhahttivuohta fokusis

Jos fitnodat galggaš šaddat gánnáhahttin, de berre ovttaolbmofitnodaga dienas leat badjel miljon ru. Váldofokus «Faamoe» oktavuođas lea danne dietnasa buorideapmi. Dan geažil loahpahuvvo čoagganeapmi Oslo Design Fair meassuin borgemánus 2020, gos sámi fitnodagat duođai ožžot vejolašvuođa oahpásmuvvat ja dahkat šiehtadusaid vuvdiiguin mat vuvdet viidáseappot.

- Vihtta válljejuvvon fitnodaga šaddet ovdanástin eará sámi fitnodagaide, mat galget dihkkádit geainnu meinnestuvvi ealáhushutkin. Mii dárbbašat sámi fitnodagaid mat sáhttet doaibmat ráđđeaddin eará sámi gávppašeddjiide go sii dovdet sámi kultuvrra ja hástalusaid gávppálaš doaimma oktavuođas, dadjá sámediggepresideanta Aili Keskitalo.

Jearahallama addá sámediggepresideanta Aili Keskitalo, tel: 97129305

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!