PRD: Sámediggi addá doarjaga doaibmavistái Deanus

Sámediggi juolluda 450 000 ru doarjjan Návet Doallu DA doaibmavistti stuorideapmái Deanus.

Ođas | Almmuhuvvon

Návet Doallu DA lea okta stuorámus oktasaš návehiin Finnmárkkus ja das leat dál sullii 100 mielkegusa ja 95 gálbbi návehis. Ovttasdoaibma ásahuvvui 2005:s ja das leat mielde golbma dálu ja njeallje aktiivvalaš oasseváldi. Dán lágan ovttasdoaimmaiguin lea álkit organiseret astoáiggi ja luomuid go jos barggašedje sierra.

– Lea buorre go Návet Doallu DA áigu ovddidit doaimmas. Eanandoallu Deanus lea deaŧalaš ealáhus gielddas, dadjá sámediggeráđđi Silje K. Muotka (NSR).

Eanandoalloealáhus lea bidjan vuođu ássamii Deanus ja lea váikkuhan dasa ahte ollu fitnodagat leat ásahuvvon Detnui. Sihke meieriijas Deanus, Felleskjøpetis, mášenfitnodagain, ealáhushutkiin ja eará doaimmain leat boanddat deaŧalaš kundarat.

Go addá doarjaga dán huksemii, de nanne dat dán doalu doaibmavuođu. Go hukse ođđa roavvafuođđarsilo ja viiddida fuođđarlanja, de álkidahttá dat barggu doaibmavisttis. Dan geažil šaddá maiddái eanet optimála biebman.

– Davvin lea divraset go máddin hukset eanadoalus. Mii leat movtta go Sámediggi sáhttá addit doarjaga mainna geahppudit ekonomalaš noađi dán lágan huksemiid oktavuođas, dadjá Muotka.

Dat go nuorat maiddái besset searvat bargui dagaha ahte ovttasdoaibma sihkkarastá nuoraid rekrutterema. Go nuorat bissot gielddas, de geasuha dat maiddái eará nuoraid bissut gielddas.

– Doaibmavisttiid ođasmahttin ja viiddideapmi sihkkarastá ahte nuoraid mielas šaddá geasuheaddjin áŋgiruššat dahket eanadoalu birgejupmin, dadjá Muotka.

Sámediggi lea várren lagabui 10 miljon ru 2020:s vuođđoealáhusaide. Dáinna vuoruhemiin leat Sámedikkis vejolašvuođat doarjut dán lágan huksendoaibmabijuid.

Gažaldagaide vástida ja addá jearahallama sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!