PRD: Sámediggi addá stipeandda oahpaheddjiide váldit lassioahpu

Sámedikki 2020 bušeahta meannudeames mearriduvvui ahte stipeandavejolašvuođat viiddiduvvojit. Dál sáhttet oahppan oahpaheaddjit oažžut stipeandda háhkat alcceseaset oahpahusgelbbolašvuođa sámegielain. – Dat addá vejolašvuođa rekrutteret oahpaheddjiid viidábut, dadjá sámediggeráđđi Mikkel Eskil Mikkelsen.

Ođas | Almmuhuvvon

Sámediggi lea dán rádjai addán stipeandda ođđa studeanttaide geat váldet earret eará vuođđoskuvlaoahpaheaddji oahpu. Dál jorgala Sámediggi dan joavkku guvlui geain lea gelbbolašvuohta sámegielas, muhto ii leat formála oahpahusgelbbolašvuohta sámegielain, ja addá stipeandda oahpaheddjiide geat háliidit oahpahit sámegielain, muhto sis váilot oahppočuoggát das.

IMG_E3510.JPG

Sámediggeráđđi Mikkel Eskil Mikkelsen

FOTO | Åse M.P. Pulk/Sámediggi

Stuorra oahpaheaddji váilivuohta

– Mii dárbbašat eanet oahpaheddjiid, mis váilot ollu oahpaheaddjit, nugo maiddái Riikarevišuvnna raporta čujuha. Dát lea okta doaibmabijuin mii dávista Váibmogielain maid mii čalmmustat 2020 bušeahtas dusten dihtii dán hástalusa, dadjá Mikkelsen.

Riikarevišuvdna konkludere skábmamánu 2019 raporttas ahte leat menddo unnán oahpaheaddjit. Seammás čujuha ahte sámegielat oahpaheddjiid lohku, erenoamážit julevsámi guovllus, njiedjá.

– Sámedikkis lea ovddasvástádus gelbbolašvuođa hástalusaid dustemis sámi servodagas. Guovddáš váikkuhangaskaoapmi leat stipeanddat. Danne fertet Mikkelsen.

Movttiidahttit válljet sámi oahpuid

Bušeahta meannudeames ii viiddiduvvon dušše stipeandavejolašvuohta. Dál galgá Sámediggi deaivvadit maiddái sámi joatkkaskuvllaid ohppiiguin movttiidahttin dihtii sin válljet sámi oahpuid. Ohppiide galgá leat deaivvadanbáiki gos sidjiide addojuvvojit dieđut sámi oahppovejolašvuođaid birra.

– Mii fertet bovdet buot sámi joatkkaskuvla ohppiid diehtojuohkimii vejolašvuođaid birra mat gávdnojit sihke stipeanddaid ja oahppovejolašvuođaid bokte. Doppe besset oahppit deaivvadit buot universitehtaiguin ja allaskuvllaiguin main lea sámi oahppofálaldat, dadjá Mikkelsen.

Čiekŋudančuoggát

Sámediggi addá stipeandda ohppiide geain lea sámegiella vuosttaš dahje nubbin giellan joatkkaskuvllas. Dál lea Sámedikki dievasčoahkkin mearridan ahte oahppit geain lea sámegiella vuosttaš giellan galggašedje oažžut čiekŋudančuoggáid das.

– Mii diehtit joatkkaskuvlla ohppiid stipeandaortnega bokte guđe skuvllain oahppit leat. Dál mii háliidat addit dáid ohppiide gilvoovdamuni oahppoásahusaide sisaváldima oktavuođas. Sihke stipeanda, čiekŋudančuoggát ja oahppokonferánsa leat doaibmabijut maiguin dustet gelbbolašvuođa dárbbu mii sámi servodagas lea, dadjá Mikkelsen.

Jearahallama addá dahje vástida gažaldagaide sámediggeráđđi Mikkel Eskil Mikkelsen, tel. +47 917 42 161.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!