PRD: Sámegiela bokte nannet sámi identitehta Návuonas

Sámediggeráđđi lea juolludan 150 000 ruvnno Návuona suohkanii ja 155 000 ruvnno Burfjord Traveliii ásahit giellaarenaid giellaealáskahttimii.

Ođas | Almmuhuvvon

Sámegielas leat unnán giellaarenat Návuona suohkanis. Doarjjaohcciid ulbmil lea fállat vejolašvuođaid loktet giellagelbbolašvuođa ja dakko bokte maiddái nannet sámiid identitehta mearrasámiguovlluin.

Návuona giellaguovddážii lea juolluduvvon doarjja lágidit giellakurssaid rávisolbmuide geat ovdalaččas eai máhte sámegiela. Ulbmil lea movttiidahttit sámegiela geavaheapmái suohkanis, ja eambbo giellaguddiid bokte boahtteáiggis rekrutteret oahppan olbmuid oahpahit sámegiela skuvllas.

Burfjord Travel Mikkel Eivind Oskal bokte, áigu ges fállat giellaarena mánáide, nuoraide ja rávisolbmuide gos árbevirolaš bargguid bokte besset oahppat ja nannet sámegielmáhtuset. Ohcci áigu ovttasbargat Návuona giellaguovddážiin.

– Suohkaniin gos sámegielas ii leat nu nanu sajádat, nu go ovdamearkka dihte riddosuohkaniin, leat dákkár doaimmat dehálaččat bisuhit ja nannet giela. Giellaarenaid ja kurssaid bokte háliidit boktit beroštumi sámi árbevirolaš bargguide, ja dainna lágiin maiddái nanusmahttit sámi iešdovddu, dadjá sámediggeráđđi Mikkel Eskil Mikkelsen (NSR). 

Sámediggeráđđi oaidná positiivvalažžan go suohkaniin leat guhkit áigge strategiijat gielladoaimmaiguin maid čađahit.

Doarjagat juolluduvvojit doarjjaortnegis Giellaprošeavttat.

Jearahallama addá dahje vástida gažaldagaide sámediggeráđđi Mikkel Eskil Mikkelsen (NSR), tel. +47 917 42 161.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!