Sámediggeráđđi juolluda 1,3 miljon ru sámi musihka ja luđiid almmuheapmái

Dán ohcanvuorus leat gávcci almmuheami ožžon doarjaga sámediggeráđis sámi musihka ja luđiid almmuheapmái, ja ohcamiid ja juolludusaid gaskkas leat buorit variašuvnnat.

Ođas | Almmuhuvvon

Juolludusaid ulbmilin lea ovdánahttit buori sámi musihka mii olaha ollugiid. Dán jagi lea addojuvvon doarjja sihke ođđaáigásaš ja árbevirolaš sámi musihkkii.

– Sámi musihkka lea deaŧalaš ja áidnalunddot oassi min kultuvrras. Ohcamat ja juolludusat čájehit ahte dáhpáhuvvá ollu mii lea gelddolaš dán suorggis. Ollu šlájat leat mielde ja ollu artisttat dollet alla dási, dadjá sámediggeráđđi Henrik Olsen.

Okta erenoamáš prošeakta maid son háliida váldit ovdan lea ahte dál galgá almmuhuvvot ođđa filbmamusihkka Ofelaš-filbmii, masa earret eará Marja Mortensson searvá.

Doarjja lea addojuvvon sihke ođđa artisttaide ja ásahuvvon sámi artisttaide. Earret eará lea addojuvvon doarjja čuovvovaččaide; Kajsa Balto, Niillas Holmberg, Ville Søderbaum ja Katarina Barruk.

Doarjja lea addojuvvon maiddái luđiid almmuheapmái, daid gaskkas leat Johan Anders Bær, Elen Utsi ja Juoigiid Searvi, mat galget almmuhit ávvoálbuma.

– Mii leat movtta go ollugat leat searvvahan luođi árbevirolaš dahje ođđaáigásaš hámis iežaset musihkkii, dadjá Olsen.

Čuovvovaš ohcanáigemearri sámi musihka ja luođi doarjjaortnegis lea cuoŋománu 1. b. 2019.

Gažaldagaide vástida ja addá jearahallama sámediggeráđđi Henrik Olsen, +47 907 75 219

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!