Sámi mátkeealáhusvásihusat loktejuvvojit ovdan

Sámediggi ja Romssa suohkan álggahit áidnalunddot prošeavtta man ulbmilin lea sihkkarastit ahte sámi kultuvra mátkeealáhusain hálddašuvvo buori ja gutnálaš vuogi mielde.

Ođas | Almmuhuvvon

Oktasaš preassadieđáhus sámediggeráđi Silje Karine Muotka ja Romssa suohkana sátnejođiheaddji Kristin Røymo bokte, Vahca oktasaš prošeavtta birra sámi kultuvrra ektui mátkeealáhusoktavuođas.

Sámi kultuvra lea nanus Davvi-Norggas ja dat geasuha hui sakka mátkeealáhusaid oktavuođas. Dát lea vuolggasadjin Sámedikki ja Romssa suohkana gaskasaš ovttasbargui, man oktavuođas gávnnahit čovdosiid movt buoremus vuogi mielde hálddašit sámi kultuvrra mátkeealáhusain. Romsa lea maŋimuš jagiin vásihan ahte dát ealáhus lea ollu ahtanuššan, guossit bokte miehtá máilmmi, mat dađistaga jearahit sámi vásihusaid.

– Sámediggái lea deaŧalaš ahte sámi sisdoallu suodjaluvvo, ja ahte vásáhusat ja buktagat mat fállojuvvojit leat autenttalačča ja main lea buorre kvalitehta. Mii háliidat oččodit dihtomielalašvuođa fáddái vai sámi álbmot sáhttá čevllohallat dan vuogi ektui movt mátkeealáhusaktevrrat čalmmustit min kultuvrra, dadjá sámediggeráđđi Silje Karine Muotka.

Romsa ovddasmanni suohkanin

Ovttasbargoprošeavtta bargonamma lea Vahca, ja dat čájeha movt Romsa áigu ovddabealde mannat buorrin ovdamearkan ja dihkkádit bálgáid maid earát sáhttet čuovvulit, dan ektui movt sáhttá hálddašit sámi kultuvrra gávppálaš oktavuođas, mas fokusis lea stuorát árvoháhkan ja ceavzilis ahtanuššan.

– Romssa suohkana ođđa mátkeealáhusstrategiijas lea fokusis báikkálaš identitehta nannen, vásihusat ja buktagat. Mun lean sátnejođiheaddjin rámis ovttasbargošiehtadusain mii mis lea Sámedikkiin. Midjiide lea deaŧalaš gozihit sámi identitehta ja historjjá, maiddái dan bokte ahte positiivvalaččat nannet buriid buktagiid ja aktevrraid mat barget suohkanis. Olbmot leat sáhkkii dan ektui movt ii eallit dáppe Árktisis, sámevuođas lea stuorra ja deaŧalaš sadji muitalusas min birra, dadjá sátnejođiheaddji Kristin Røymo.

Dál leat juo boahtán positiiva signálat earret eará Romssa ealáhuseallimis prošeavtta birra, man oktavuođas máŋggat aktevrrat leat dovddahan oppalaččat ahte háliidit áŋgiruššat eanet báikkálaš, sámi buktagiiguin. Vahca-prošeakta lea ožžon maiddái deaŧalaš doarjaleddjiid nugo DavviNorgga mátkeealáhusat, NHO Reiseliv, UiT Norgga árktalaš universitehta, ja dasto ovttaskas fitnodagat ealáhuseallimis ja mátkeealáhusain guovllus.

Álggahanseminára

Dál leat bealit olles leavttuin plánemin sierra seminára buot aktevrraide main lea beroštupmi fáttás sámi kultuvra ja mátkeealáhusat Romssa, mii lágiduvvo guovvamánu 5. b. 2019 ja masa dál sáhttá dieđihit.

Seminára ovdan buktá buriid ovdamearkkaid sihke davvin ja riikkaidgaskasaččat, man ulbmilin lea movttiidahttit ja inspireret mátkeealáhusaid ja earáid guovllus. Fáddán lea mátkeealáhusat ja identitehta, ja mihttomearrin lea álggahit digaštallama dan birra movt mii háliidat galgá leat, lávga gulahallamiin ealáhusain iežainis.

– Mainna lágiin bargat ahte Romsa ja mátkeealáhusaktevrrat galget šaddat “buoremus geavahus” gávpot go guoská turismii, mátkeealáhusaide ja álgoálbmotkultuvrraide? Mis lea guhkes áiggi áigumuššan ovddidit buriid gaskaomiid mainna lágiin buoremusat hálddašit álgoálbmotkultuvrra ealáhusoktavuođas, mii maŋŋá sáhtte váikkuhit sihke nationála dásis ja riikkaidgaskasaččat, loahpaha sámediggeráđđi Silje Karine Muotka.

Gažaldagaide vástideaba ja addiba jearahallama:
Ráđđelahttu Silje Karine Muotka Sámedikkis, tel: 984 87 576
Sátnejođiheaddji Kristin Røymo Romssa suohkanis, tel: 480 53 372

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!