- Boazodoalu fágareiveortnet menddo deaŧalaš das ahte dan sáhttá heaittihit

Sámediggi ovddida juohke jagi cealkámušaid boazodoallošiehtadussii. Oassebeliid árvalusas leat dán jagi deattuhuvvon váikkuhangaskaoamit kultuvrralaš ceavzimii, areálavuđđosa sihkkarastin, čálgoortnegat, rekrutteren, dásseárvu ja ekonomalaš ovdáneapmi.

Ođas: Almmuhuvvon , ođasmahtton

Buorre rekrutteren lea deaŧaleamos eaktun dasa ahte boazodoallu galgá ceavzit ja ovdánit viidáseappot, ja sámediggeráđđi Marian Wollmann Magga bivdá šiehtadusbeliid sihkkarastit viidásat ruhtadeami boazodoalu fágareiveortnegii.

– Dát ortnet lea boazodollui dahkan vejolažžan váldit fidnoohppiid, ja dat fas lea veahkehan boazodoalu loktet gelbbolašvuođa ja formaliseret fágamáhtu boazodoalus, oaivvilda Magga.

Šiehtadusbealit sohpe 2016/2017 boazodoallošiehtadusas ahte galgá geahččalit lágidit fágareiveortnega nu ahte dan sáhttá heaittihit, jus ii gávdno eará ruhtadeapmi.

– Eará ruhtadeapmi ii leat sajis, ja mun lean danne šiehtadusbeliid bivdán joatkit ruhtadanortnega boazodoallošiehtadusa bokte. Ortnet lea menddo deaŧalaš dasa ahte dan sáhttá heaittihit, dadjá Mariann Wollmann Magga.

Sámediggeráđđái lea maid deaŧalaš ahte láhččojuvvo ekonomalaš ovdáneapmái ja eanet árvoháhkamii boazodoalus. Boazodoalus leat stuorra golut, ja dat čatnasa eanaš fievrruid oastimii ja doaimmaheapmái.

– Dál lea áigi ahte boazodoallu dássiduvvo eará vuođđoealáhusaiguin, ja ahte boazodoalu divatortnegiidda gustojit seamma njuolggadusat go eanadollui. Dat mearkkaša ahte ferte ásahit ortnegiid boazodollui mat addet vejolašvuođa dakkár ealáhusgessosiidda go ovttagearddedivat, lasseárvodivat ja boaldámušdivadat, cealká sámediggeráđđi Mariann Wollmann Magga.

– Mii diehtit ahte dakkár ortnet galgá ráddjejuvvot nu ahte dat boahtá daidda boazodolliide buorrin geain lea ealáhusdoaibma, ja evttohit danne ahte ortnegat galget gustot sidjiide geat leat registrerejuvvon lasseárvodivatregistarii, dadjá Magga viidáseappot.

Boazodoallošiehtadallamat čađahuvvojit guovvamánus, ja sámediggeráđđi Mariann Wollmann Magga sávvá oassebeliide lihku šiehtadallamiidda.

– Buori boazodoallošiehtadusas lea stuorra mearkkašupmi positiiva ovdáneapmái boazodoalus.

Váldde oktavuođa sámediggeráđiin Mariann Wollmann Magga, mob. +47 977 02 350 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!