Sámediggi juohká juohke njealját jagi giellamovttiidahttinbálkkašumi, ja dan sáhttá addit ovttaskas olbmui dahje fitnodahkii, prošektii dahje organisašuvdnii, mii lea garrasit bargan sámegiela nannemiin, ovddidemiin ja seailluhemiin. Bálkkašupmi lea 50 000 ruvnnu ja dáiddadiploma.

Lea sámediggeráđđi mii mearrida geasa bálkkašumi galgá addit. Bálkkašupmi juhkkojuvvo Sámedikki dievasčoahkkima oktavuođas geassemánus.

- Leat ollu sápmelaččat geat áŋgiruššet sámegiela ovddidemiin, sihke ovttaskas olbmot, organisašuvnnat ja ásahusat, ja geat leat bargan ja ain barget rámpon veara barggu sámegiela ovddas. Sámediggeráđis mii mielas váldit vuostá ja árvvoštallat ollu evttohasaid, ja mii illudit guđát geardde juohkit giellamovttiidahttinbálkkašumi, lohká sámediggeráđi lahttu Lars Filip Paulsen, geas sámediggeráđis lea giellaovddasvástádus.   

Bálkkašupmi juhkkojuvvui maŋimuš 2013:s. Dalle oaččui čálli, juoigi ja oahpaheaddji guovdageaidnulaš Ánte Mihkkal Gaup/Iŋgor Ántte Ánte Mihkkal bálkkašumi.

Sámi giellaráđđi ásahii giellamovttiidahttinbálkkašumi jagis 2000, ja bálkkašupmi juhkkojuvvui vuosttaš geardde Sámedikki dievasčoahkkima oktavuođas 2000 skábmamánus. Dan maŋŋá lea Sámedikki giellastivra ja sámediggeráđđi juohkán bálkkašumi. Giellamovttiidahttinbálkkašupmi juhkkojuvvui jagis 2000 Divttasvuona vánhenjovkui, jagis 2001 Skániid ja Evenášši giellajovkui, jagis 2002 gáivuotnalažžii Harry Solhaugii ja jagis 2009 deardnálažžii Sagka Stångbergii.

Juohkehaš sáhttá evttohit gii galggašii vuoitit giellamovttiidahttinbálkkašumi, ja áigemearri sáddet evttohusa lea cuoŋománu 30. b. Sádde evttohusa samediggi@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!