– Dát lea fágasuorgi mas ollásit leat váilon oahpporesurssat sámegillii. Lean hui ilus go dál viimmat bohtet diekkár oahpponeavvut sámegillii, dadjá sámediggepresideanta Vibeke Larsen.

Givssidaneastadanoahpponeavvuin leat máŋga oasi, earret eará galgá ráhkaduvvot ohppiide girji, neahttasiidu filbmabihtáiguin ja neahttaspealuin, ja oahpaheaddjibagadus.

Dán jagi lea sámediggeráđđi maid vuoruhan applikašuvnna ovddideami olbmuide geain leat giella- ja hupmanváttut. Dán lágan oahpporesurssain jearahit sámegielat logopedat.

– Lea dehálaš bidjat ruđaid oahpporesurssaide mat galget mánáide ja nuoraide geain leat erenoamáš dárbbut, dadjá Larsen.

Oahpponeavvojuolludemiin dán jagi lea fokus sámi gillii joatkkaskuvla dásis, gos dál galgá biddjot johtui oahpponeavvoovddideapmi sihke deaddiluvvon ja digitála komponeanttaiguin. Sámediggi lea juolludan doarjagiid prošeavttaide mat leat sihke lulli-, julev- ja davvisámegillii.

– Sámediggeráđđi lea maid duhtavaš dainna go mii dán jagáš bušeahtas leat sáhttán addit doarjagiid ođđasit deaddilit bivnnuhis oahpponeavvuid, dadjá Larsen.

Dán jagi várrii Sámediggi 20,5 miljovnna ruvnno dábálaš ja erenoamážit heivehuvvon oahpponeavvuide vuođđooahpahusa váras. Sámediggi oaččui ohcamiid oktiibuot 63 miljovnna ruvnno ovddas. Vaikko leat olu ohcamušat bušeahttarámma ektui, de lea sámediggeráđđi duhtavaš go leat sáhttán gokčat eanaš vuoruhuvvon surggiid dán jagi.

Sámedikki doaibmaplána oahpponeavvoráhkadeapmái áigodagas 2015-2018 lea vuođđun Sámedikki jahkásaš vuoruhemiide. Dasa lassin lea dálá bargu fágaođasmahttimiin skuvllas maid váikkuhan dán jagáš vuoruhemiide.

– Mu mihttomearri lea ahte oahpponeavvoovddideapmi ii bisán dahje bissehuvvo fágaođasmahttima geažil, ja dasto lea mu mihttomearri geahččat bearrái ahte oahpponeavvut mat dál galget ráhkaduvvot, heivehuvvojit skuvlla boahtteáiggi sisdollui, dadjá sámediggepresideanta Vibeke Larsen.

Geahča sierra dokumeanttas makkár oahpponeavvuide lea juolluduvvon doarjja jagis 2017.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!